ഡെൻവർ: ടേക്ക് ഓഫിനിടെ വിമാനം ഇടിച്ച് റൺവേയിലുണ്ടായിരുന്നയാൾ മരിച്ചു. അമേരിക്കയിലെ ഡെൻവർ അന്താരാഷ്ട്ര വിമാനത്താവളത്തിൽ വെള്ളിയാഴ്ച പ്രാദേശികസമയം രാത്രി 11.19നായിരുന്നു സംഭവം.
ഡെൻവറിൽനിന്നു ലോസ് ആഞ്ചലസിലേക്ക് പോകുകയായിരുന്ന ഫ്രോണ്ടിയർ എയർലൈൻസിന്റെ എയർബസ് എ321 വിമാനമാണ് അപകടത്തിൽപ്പെട്ടത്.
ടേക്ക് ഓഫ് ചെയ്യുന്നതിനിടെ റൺവേയിലൂടെ നടക്കുകയായിരുന്ന വ്യക്തിയെ ഇടിക്കുകയായിരുന്നു. തത്ക്ഷണം മരിച്ചു.ഇദ്ദേഹം വിമാനത്താവളത്തിലെ ജീവനക്കാരനല്ലെന്ന് അധികൃതർ സ്ഥിരീകരിച്ചു.
അപകടത്തെത്തുടർന്ന് വിമാനത്തിന്റെ എൻജിനിൽ തീപിടിത്തമുണ്ടാകുകയും കാബിനിലേക്ക് പുക പടരുകയും ചെയ്തു. ഇതോടെ യാത്രക്കാരെ അടിയന്തരമായി ഒഴിപ്പിച്ചു. 12 യാത്രക്കാർക്ക് ചെറിയതോതിൽ പരിക്കേറ്റെന്നും അഞ്ചുപേരെ ആശുപത്രിയിൽ പ്രവേശിപ്പിച്ചെന്നും വിമാനക്കന്പനി അറിയിച്ചു.
വിമാനത്തിൽ 224 യാത്രക്കാരും ഏഴു ജീവനക്കാരുമാണ് ഉണ്ടായിരുന്നത്.
മരിച്ചയാൾ വിമാനത്താവളത്തിന്റെ സുരക്ഷാവേലി ചാടിക്കടന്ന് റൺവേയിൽ എത്തിയെന്നാണു പ്രാഥമിക നിഗമനം.
സംഭവത്തിൽ അന്വേഷണം ആരംഭിച്ചിട്ടുണ്ട്. അന്വേഷണം പൂർത്തിയാകുംവരെ സംഭവമുണ്ടായ റൺവേ അടച്ചിടുമെന്ന് വിമാനത്താവള അധികൃതർ അറിയിച്ചു.